¿Que é o Rexistro da propiedade intelectual?

Un instrumento de constancia oficial da titularidade dos dereitos de propiedade intelectual sobre unha creación orixinal literaria, artística ou científica ou sobre unha actuación ou producción das contempladas na Lei de propiedade intelectual.

¿Que funcións ten o rexistro?

Corresponden ó rexistro territorial as seguintes funcións:

a) Tramitación e resolución das solicitudes de inscrición e anotación, como tamén, de se-lo caso, a cancelación e a práctica das que procedan.
b) Certificación e demais xeitos de publicidade dos dereitos, actos e contratos inscritos no rexistro territorial.
c) Emisión de informes de carácter técnico sobre cuestións referentes ás inscricións de dereitos, actos e contratos sobre obras, actuacións ou produccións protexidas polo Real decreto lexislativo 1/1996, do 12 de abril, polo que se aproba o texto refundido da Lei de propiedade intelectual, cando sexan requiridos por xulgados, tribunais ou outros organismos ou entidades públicas.
d) Arquivo e custodia dos documentos e materiais depositados.

¿Que finalidade ten o rexistro?

Protexe-la propiedade intelectual ó dar seguridade xurídica sobre os dereitos que a integran e ofrecer unha proba cualificada sobre a existencia e pertenza dos citados dereitos.

¿Que tipo de rexistro é?

É un rexistro de dereitos, non de obras, actuacións a produccións en si mesmas, senón dos dereitos de propiedade intelectual que os autores (creadores físicos das obras) e os titulares (ese mesmo autor ou outra persoa física ou xurídica que adquirira mortis-causa ou por cesión dalgún ou tódolos dereitos de explotación da obra) teñen sobre aquelas obras, actuacións ou produccións.

¿Que obxecto ten o rexistro?

A inscrición dos dereitos relativos a obras, actuacións a produccións protexidas pola Lei de propiedade intelectual e os convenios internacionais ratificados por España.
A inscrición dos actos e contratos de constitución, transmisión, modificación e extinción relativos a aqueles dereitos de propiedade intelectual.

¿Que obras poden acceder ó rexistro?

As creacións orixinais literarias, artísticas ou científicas, abarcando estas categorías, ademais das prototípicas (textos literarios e científicos, musicais e plásticas), obras de moi diversa e novidosa tipoloxía: audiovisuais, programas de ordenador, bases de datos, proxectos e deseños de arquitectura e enxeñería, multimedias, páxinas web…
Ademais pódense rexistrar tamén dereitos de propiedade intelectual sobre fotografías, actuacións de artistas, intérpretes ou executantes, produccións (fonográficas e de gravacións audiovisuais) e determinadas edicións editoriais.

¿Que procedemento supón o rexistro?

Solicitude formal de inscrición dos dereitos de propiedade intelectual.
Cualificación das solicitudes e exame da legalidade dos actos e contratos relativos ós dereitos inscribibles, requirindo a corrección de defectos cando proceda.
Resolución das solicitudes denegando ou practicando a inscrición de dereitos.

¿Que persoas están lexitimadas para solicita-las inscricións no rexistro?

Os autores e demais titulares orixinarios de dereitos de propiedade intelectual con respecto á propia obra, actuación ou producción.
Os sucesivos titulares de dereitos de propiedade intelectual se se producisen transmisións, mortis-causa ou intervivos, polo falecemento do autor ou por acordos expresos de cesión de dereitos.

¿Que requisitos son esixibles para acceder ó rexistro?

1. Achega dun exemplar da obra, encadernado, paxinado e asinado (a excepción das plásticas, nas que será suficiente a súa identificación a través de fotografías) e dunha copia dos documentos identificativos de autores e titulares de dereitos.
2. Cumprimenta-los impresos oficiais relativos á identificación do autor e titular de dereitos, e ás características da obra.
3. Aboamento das taxas correspondentes conforme ás contías establecidas no art. 20 da Lei 66/1997, de medidas fiscais, administrativas e da orde social, do 30 de decembro, actualizada polo artigo 67 da Lei 23/2001, do 27 de decembro, de presupostos xerais do Estado para o ano 2002.

¿Que efectos ten a inscrición rexistral?

Efectos probatorios derivados da presunción normativa que establece que salvo proba en contrario dos dereitos, existen e pertencen ó seu titular na forma determinada no rexistro.
Efectos publicitarios derivados do carácter público do rexistro que posibilita que calquera persoa interesada poida ter coñecemento dos datos inscritos.